Розділ «Том IX. Роки 1650-1657»

На что воєвода: Не стою я здЂ ани по римску ниж по казацску, стою аки санатор присяглый, тоє глаголя: Кто не хощет смирити ся, сей виною будет войны новой! ты, отче митрополита хощеш все взяти, а унияты ничего не хотят дати; блажени хотящи мира, сотворите мир для бога.

На что от. митр: Уж я обЂщал ся до согласія приступити, но тол(ь)ко своє впрям просим, да учинят мои духовныя совЂт, аще ли со мною совЂт(ни).

На що єпископъ Лвовский православный; отецъ архимандрин печарский, отецъ игуменъ михайловский повЂдали: Мы со отцем митрополитомъ єдиной воли и хотЂния; инако — аще бы отецъ митр., восхотЂл премЂнити предложеніє, а приступити к согласію их, мы свидЂтел(ь)ствуемъ на отца митр. Да идут панове униты или до костела римского, или куды хотят, а намъ от всЂхъ церквей со всЂмъ сокровищем отступят.

На что бискуб виленский: Вижю, здЂ вам уж не о благочестии, но о держаніи панства идет! Тщета обаче ярити ся, но на права и на вол(ь)ности Речи Посполитой поглядати!

Пан воєвода: В великом спору идете. Имам страх здЂ страхом моимъ повЂдати, тяжестно бо кому будет, что возглаголю. Вы отцове униты аще будете в своємъ споре стояти, погубите отчизну не хотя ничего уступити для упокоєнія всей Речи Посполитой. А ты, отче митрополито и вси духовныя, изволите вЂдати о семъ, открыю вам остатний совЂтъ. Уже на прощеніи с паном гетманом запороским, совЂтуючи с ним о мирЂ, и онъ приказал наибол(ь)шее имЂти попеченіе о благочестии и о разореніи унии — “А инако мы или паки до войны, или до короля пошлем просячи, абы намъ Зборовскоє постановленіє подтвердилъ, и милость свою о разорении унии оказал. Прочая тебЂ, пане воєводо, вручаємъ, дабы покой совершеный и упокоеніє мира створил, во ином же сам познаєшь как творити”.

Отецъ митрополит не разсуждая гетманскаго приказанія стал притом неотступно, же мы о всем просим. На то ксондз бискуп познанскій съ гнЂвом повЂдал: В неволю бо толику нас не введете, а я до короля Ђду, и извЂщу тоє совЂтованіє. И такъ ничего не совершивше раз'Ђхали ся.

В нeдЂлю [1756] на службу божію приЂхал к нам воєвода и пан киовскій с прочими панами обывателями. По службЂ божієйс сЂли [1757] з духовенствомъ панъ воєвода и панъ киовскій, моля отца митрополита, что умыслил в той справЂ. На что отецъ митрополит отвЂщал, что аз вчера предолжил пред всЂми бискупами и пред (ва)ми сенаторами, же никако своєго унитом не попущу, но зело короля пана и вас всЂхъ пановъ о сиє просим.

На что воєвода: “Преосвященный отче митрополите, и вы отцы честнии, не надЂйтеся на князя ни на сыны человЂческія, в них же нЂсть спасенія, изыдет дух єго и возвратится в землю свою, в той день погибнут вся помышленія єго. Нетреба благочестія нашего на силу козацкую полагати, благочестіє бо когда оружиєм въстанет, оружиєм и падет. Потреба при разсужденіи Речи Посполитой вся творити, и како пришла бы вещ(ь) до войны великой, побЂдили бы Поляки, мы бы згинули, побЂдили бы козаки, вы по старому бы слуги слугъ своихъ были бысте. Я так совЂтую: пер› — дабы самы сеймъ не разрушили, за которым разрушеніємъ вол(ь)ности войска Запороскаго, которых они єще утверженных не имЂютъ, а вправду у нихъ милость и вЂрность погубим, вЂдаєм бо добре, какіє у них нравы єгда сеймъ ради нашего благочестія разрушит ся, то внезапную войну сотворим, и навЂки зломышленіе на благочестіє наше от Ляхов будетъ; побЂдят ли Ляхи ино мы погибли, побЂдятъ казаки, мы по старому в служенїи имъ. А потом єгда панства ани рядити ани удержати сами возмогутъ, достанем ся в чии третіи руки. Втретіє, начнем о Зборовских правах, на которых все стало, и изволим паки на сеймъ о разрушеніи уніи, аще ли съЂздъ будет, но нынЂ ничего не получим, что смы взяли кровію, и паки будет война, и при ком побЂда будет, той и право писати будет. И какъ то зло єст(ь) ни с чем отсюду от'Ђхати, так зло (єсть) споромъ своимъ сеймъ разрушити, и вол(ь)ности войску Запороскому не утвердити, и войну наглую и страшную сотворити. Но лучше с потЂхою до краєв своих и съ святым миром, и до войска Запорозскаго с вол(ь)ностями Ђхати, и до тЂх убогих християнъ с волею, которіи в плененіи нынЂ живут.

“Опрочь всего что єсть в Лит†обиды святой церкви чрез право умершаго короля, дабы сіє за универсалом нынЂшняго короля скоро привернено было, и праздный монастирь Лещь зовомый дабы был отданый православнымъ; Купятицкій дабы был привращенный: в Смоленску дабы братиям нашим по хотЂніи их збыло.

“В КоронЂ ж церковь Любел(ь)ская, владыцство Хелмскоє пражднующеє чтобы были отданы; владыцство Премысльскоє дабы привращенно, а Жыдычинъ дабы был привращенъ до митрополії; владыцство Хелмскоє, Белъскоє, Красноставскоє, Премысльскоє дабы нам даны; токмо владыцство Володимерскоє останет в КоронЂ, Лвовскоє же смятеніє дабы успокоєно было. То аще бы мы сїє прияли, довольно бы нам; прочая на будущїй сеймъ отлагаєм. А єгда будемъ в такой же власти, ино как умрет владыка, который униат, у которых в животЂ отбирать) невозможно, то и силою отняти возможно будет; и вскорЂ помощию божією уния исчезнет, а благочестіє процвЂтет. Инако ж кто разумЂет, и речет. А коли сила наша ослабЂєтъ. Удобно что и одержим — погибнетъ. Все бо идет за силою; писахом права и присягано нам, все сіє измЂну взяло. Что ни єст(ь) нынЂ одержати можем, ciє и приимемъ, а покою сейму не разараймо, в том бо здравіє и погібел(ь) наша.

На сіє наши: Яко мы обЂщалис(ь), в том стояти будем и же на такой подЂл добръ наших сущих не попустим, но о всем договаривати ся будем. Не разрушим тЂмъ сейму ниж разорвем мир, что нашего дововариваєм ся; той бол(ь)ше рветъ сеймъ и покой, кто чужаго отдати не хощеть.

“О утверженіи постановленія под Зборовом, о волностях козацких не договариваєм ся, ани прилагаєм ся до того, но на их крЂпости и силЂ никто ж может основатис(ь). Мы нашу обиду предлагая упокоєнія просим, на будущій сеймъ справ наших духовных не отлагаемъ, нынЂ вяшще не съ смЂхомъ да отвЂщаютъ намъ панове и ксондзы.

“А при сем аще бы смы и над козацкоє хотЂніє, котороє корол(ь) обЂщалъ, что противо сотворили, сами бы єсмы от них возвративши ся погибли, яко ты пане воєводо их обьявленє в КиєвЂ слышал. Лучше нам ни с чим до Києва Ђхати, а так не наша вина будет, но тЂх которіи противу отвЂщают, нежели с тым что ани народу Рускаго, ани казаков увеселит, и что уж они приказали дабы смы инак не позволяли, о сем зело вас молим.

На что воєвода: Неудоб взяти у короля, и Речи Посполитой не можем повелЂти. Мы просим, они не дают, неподобно бо просим; лучше просить, дабы и онЂ позволили.

На то митрополит: Кто хощет, да приступаєт к согласію их, азъ же яко духовенство вчера глаголало противо мене, инако сотворит(ь) не могу.

Настоял многажды воєвода о согласіи скором, но мы на разсужденіє взявши, уступихом во ину храмину, и тамъ на обЂ страны уговорившись так воєводЂ говорили: Любо и нам небезпечально и тщета церкви божієи, и с неутЂшениєм тЂх, котории в надеждЂ остают кролевской милости и РЂчи Посполитой, обЂщаючи себЂ отданїя всЂхъ добръ, которыми без правды унїяты владЂютъ, — но мы, смотрячи на трудности Речи Посполитой, дабы договором своим бол(ь)ши не трудити их, надЂяся себЂ болшей кролевской милости, смотрящи и на высокую честь в той справЂ, и совЂтъ таков усовЂтовали, и вам изъясняєм: дабы нам панове уніяти посредство всЂх добръ, всЂх престолов, и всЂх церквей уступили, а сами дабы ся боле не множили. По их же скончанїи дабы намъ вси добра во владЂніє отданы были.

Слышав сіє воєвода, с жалостію повЂдал: Всує вижу мой и труд, всує моє и тщаніе, вещи наклоненныя убращают ся в горшеє, аз и руки умываю, и бол(ь)ши истязоватис(ь) не хощу. Вы аще можете, сами справляйте. Подобно ли то, дабы ровная нам шляхта далась поддати нам в неволю? или на сіє изволити может ли крол(ь), дабы привилея єго от нас обезсчещены быт(ь) могли? О неудобных вещах молим. Не лучши ли то до отобранія всЂх наших вещей не будучи досадными Речи Посполитой и королю, пождати мало. А по скончаніи живущих униатов, гдЂ-нибудь покажется умерый, дабы униатом не давано, но нам да будет возвращенно, а инде и силою отимем, а так все своє обрящем. Или не говорих с послами козацкими о том, но єгда им совЂтъ той предложу, который полагаю пред вами, чаю, что и онЂ на сіє изволят, на что вы не изволяєте.

Призвано тогда послов козацкихъ к тому сидЂнію, которым воєвода свой совЂтъ ухищренно с ыными розговоры обявил: о пол(ь)зЂ покоя, и не о пол(ь)зЂ войны. — "На что бы вы панове молодцы восхотЂли изволити либо нынЂ договариваючись всЂ добра от унитов хощете побрати, а волности свои и права зборовскіє имЂти не утверженыє, сеймъ разрушит(ь), и паки непокой сотворивши отчизну воєвать(ь)? Или обЂщаніє от короля такоє имЂти, по смерти ж нынЂшных обладателей унїатских всЂм добром их владЂти, и вол(ь)ности свои и права Зборовскіє и покой имЂти утверженный, и ни с чЂмъ отсюду от(ъ)Ђхати, и сейму не разоряти. О чем меня пан гетман просил, дабы прилЂжно о том тщал ся”.

ОтповЂдал нЂкто єдинъ от казаковъ, Иванъ Крековенский [1758]: Пане воєводо, трудно нам насилством что взяти у короля и РЂчи Посполитой. Любо повинни єсмы договаривати ся обЂщанія под зборовского, что уния до конца разорена имЂла быти, и добра их возвращены нам; аж но нынЂ не все возвращают, лутче взяти чтонибудь, а по обЂщаніи вашем дабы по смерти нынЂшниє унЂятов нам возвращало ся — нежели ничего не взяти, и сеймъ розорвати. Обаче [1759] и унЂяти но во многоє время почасти, такожде и мы от них помалу отнимаючи будем отбирати.

Ciє слышав воєвода порадовался. Тутъ єще спомнили архиєпископию Полотцскую, которую владЂєт Силава уният з митрополиєю, — и тоє обЂщал воєвода извЂстити королю. И такъ розЂхали ся воєвода и послы козацкія на пир до арцибискупа.